Gnûfs implants fotovoltaics fûr de fuartece par Palme

Implants fotovoltaics fûr de fuartece, cence consum di altri teren, che a furniran energjie eletriche a abitazions e palaçs in centri storic. Chest al è ce che al sperimentarà e al fasarà a Palme il progjet ZEB4ZEN (Zero Energy Buildings for Zero Energy Neighbourhoods). Coinvoltis ancje lis citâts di Karlovac in Cravuazie, di Quedlinburg in Sassonie e di Zamość in Polonie.
La domande di contribût sui bants Interreg Central Europe e je stade acetade e finanziade: par Palme al è previodût un finanziament di 188 mil euros, sui 2 milions totâi dal progjet di fonts FESR e ministeriâls. Il progjet, unic in Italie, al podarà valê ancje tant che câs studi e esempli a nivel european. A chest finanziament si metin dongje variis progjetualitâts, simpri leadis ae realizazion di implants fotovoltaics, interessadis di bants regjonâi. (A.D.G.) – 20.12.2022