Udin si dotarà in curt di un servizi di biciclete condividude rinovât ad implen, ancje cun bicicletis cun pedalade assistude e une difusion de mobilitât sostignibile plui grande su dut il teritori comunâl. Al è ce che al previôt in struc il document aprovât de Zonte comunâl dilunc de ultime sentade, cu lis gnovis liniis di indreçament pe concession dal servizi in citât.
Il servizi di cumò al è basât su 24 stazions fissis cun puescj par cuasi 300 bicicletis, ma a 15 agns de sô inaugurazion i malfunzionaments a son cetancj e lis bicicletis, dome 45 a son chês che ancjemò si puedin doprâ, no permetin di gjoldi ad implen des potenzialitâts de mobilitât sostignibile. In dutis lis grandis citâts europeanis, cun tancj esemplis ancje in Italie tant che Milan, Rome, Bologne, Palermo, Florence, Bergamo e Mantue, il servizi di biciclete condividude al previôt il nauli cence stazions fissis e cul bloc automatic de biciclete. Lis liniis di indreçament a van in cheste direzion ancje pal gnûf servizi, che al rivarà a Udin, cun cualchi precauzion impuartante par prevignî abandon o fermade salvadie dai ciclis. (a.d.g.) – 16.02.2024
