Al è propit il câs di dî che cheste volte un dai tancj delincuents che a cirin di fraudâ i nestris vielis al à cjatât ”chel dal formadi”, ven a stai un carabinîr in pension che al à nasât daurman il pericul e al à fat clamâ i coleghis intant che al jere al telefon cul fraudadôr.
Il criminâl, un om campan di 37 agns, al veve za puartât vie pôc prime a un vieli, che al è a vivi dongje Udin, 30 mil euros in zoiis e aur, ma la seconde volte e je lade mâl.
Il carabinîr in pension al à capît intun lamp, intant che al fevelave al telefon, che si tratave di un tentatîf di fraude e al à fat mot ae femine di clamâ i carabinîrs.
Al à fat daspò finte di jessi colât tal ingjan e cussì il fraudadôr si è presentât in cjase , indulà che al jere pront il tramai: a pene jentrât al à cjatât i carabinîrs, che lu àn arestât e puartât dret inte preson di Udin.
Dilunc de percuisizion de machine dal delincuent al è stât cjatât il botin de fraude za fate, tant che dute la robe puartade vie e sarà tornade al proprietari. (a.d.g.) – 03.07.2026
