Il corteu che al è tacât di place della Repubblica ae volte di place I Maggio al è stât une vore partecipât e no son stâts problemis (fintremai dal moment che o stin scrivint) come che plui di cualchidun al veve pensât. Ae sîs sot sere, cuntun pôc di ritart par vie dal fat che e veve di rivâ ancjemò int (si fevele di dîs mil partecipants) la int berghelant “Palestine libare”, compagnade di bandieris de pâs e de Palestine e dal sun dai tambûrs, e je partide passant pal centri de citât. Feminis e oms di ogni etât, tancj zovins e ancje fruts a àn cjaminât cence nissun probleme sot dal voli atent des fuarcis dal ordin che no àn vût bisugne di fâ nuie pe grande civiltât de manifestazion.
Udin, di chest pont di viste, e à à fat un figuron a nivel nazionâl, forsit ancje in graciis dal fat che chei che a podevin creâ problemis no son rivâts.
Inzornament aes vot e cuarante sot sere: magari cussì no, in place I Maggio a Udin, cuant che aromai la manifestazion a pro de Palestine e jere finide, a son tacâts scuintris tra manifestants e fuarcis dal ordin, tant che a son jentrâts in funzion ancje i idrants de Polizie. (a.d.g.) -14.10.2025
