Il Cjars candidât a ‘I lûcs dal cûr’ dal Fai

I fûcs che dai 15 di Lui a cjapin dentri plui zonis dal Cjars, tra Italie e Slovenie, a mostrin cetant che chest teritori al sedi fragjil. Un lûc dividût vuê in plui Stâts tant che confins politics (Italie, Slovenie e Cravuazie), ma che al è sintût cjâr te stesse maniere di chei, e a son tancj, che lu vivin tant che une risorse uniche, comune e identitarie. Daûr di une emergjence ecezionâl che e sta colpint cheste straordenarie union naturalistiche, storiche e culturâl, la Presidence Regjonâl dal Fai – Fonts pal Ambient Talian – pal Friûl Vignesie Julie e à decidût di candidâ dut il teritori transfrontalîr colpît dai fugarons a “I lûcs dal cûr” il plui grant censiment spontani nazionâl pe tutele dal patrimoni talian promovût dal Fai. Une candidature poiade ancje de Regjon Friûl Vignesie Julie. (A.I.) – 28.07.2022