Il Cjars al bruse: Triest isolât

Il Cjars al bruse ancjemò, cheste volte in regjon. Il front dal fûc, componût di trê fûcs tai boscs jenfri Triest e Gurize, al va di Doberdò al Lisèrt, passant pe Beorcje di Nabresine. Lis Vuardiis dal fûc a son daûr a lavorâ des 10 di matine di miercus ai 19. Par provâ di circoscrivi lis flamis e agjevolâ lis operazions a son stâts interots il trafic feroviari, la autostrade A4 e la Statâl 55 dal Lusinç, isolant Triest. La Regjon e à sotscrit un decret di emergjence par gjestî la situazion che si è vignude a creâ inte aree, dulà che a àn lavorât par dute la gnot lis Vuardiis dal fûc, la Forestâl e la Protezion civîl. I dâts des Pm10 rilevâts de Arpe Fvj di îr si son alçâts di 100 voltis vie pe gnot. La sindiche di Monfalcon e à invidât i citadins a no lâ fûr di cjase, se no cu la mascarute Ffp2. Stop ancje ae ativitât di Fincantieri par vie dal fum intal aiar, intune situazion in evoluzion. (A.I.) 20.07.2022