Il Centri Balducci al onore pre Di Piazza

E sarà dedicade a pre Pierluigi Di Piazza, il fondadôr dal Centri Balducci, muart ai 15 di Mai, la 30e edizion de tradizionâl cunvigne a Çuian, che chest an e scomençarà ai 29 di Setembar fintremai ai 2 di Otubar. La cunvigne e celebre l’impegn e l’operât dal fondadôr, ma ancje la sô ereditât spirituâl, fondade su doi pilastris: la pratiche de solidarietât e dal acet e la promozion e difusion de culture. Ancje chest an a son tancj i amîs e relatôrs che a condividaran il lôr pinsîr, tacant di joibe ai 29 al Teatri “Giovanni da Udine”, cun ospit il gnûf president de Cei, il gardenâl Matteo Maria Zuppi. (A.I.) – 28.09.2022