Il brut timp previodût cun larc anticip al è daûr a bati la regjon. Viodudis lis previsions, la Protezion civîl F-VJ e à pandût – par dute la zornade di vuê – une alerte meteo narancine su la planure e su la marine furlane e zale sul rest de regjon.
A preocupâ a son soredut la alte maree e fenomens pussibii di aghe alte, tant che a Grau li che za cumò il puart al è somerzût e cussì la jentrade al puint zirevul che al coleghe a Aquilee no je praticabile intant che ae Isule de Vierte la aghe e je sul ôr de bancjine.
A Mugle, place Nazzareno Sauro inagade e cree discomuts aes cjasis, dut câs protetis di paradanis instaladis prime par limitâ la jentrade de aghe.
I pics di maree a son rivâts a un metri e 66 centimetris a Grau aes 9; 3 metris e 8 centimetris a Triest; un metri e 55 centimetris a Lignan; un metri e 85 centimetris a Maran Lagunâr; un metri e 56 centimetris a Monfalcon. Aes 10 i struments a àn regjistrât dut câs il câl dal nivel de maree. “Par ce che al rivuarde la maree – al sclarìs il vicegovernadôr e assessôr cun deleghe ae Protezion civîl dal Friûl-Vignesie Julie, Riccardo Riccardi – il piês al somee passât. Fin usgnot si spiete buere fuarte fin a 120 chilometris oraris su la cueste cun burascjadis probabilis bande Ovest, duncje di fat la aree di Lignan. Ploie intense confermade a nivel locâl e neveadis bondantis des 12 aes 18 di vuê”.
Lis neveadis bondantis su lis monts a varessin di limitâ i pericui di aluvion.
“La alerte meteo narancine mandade fûr de Protezion civîl regjonâl îr, viodudis lis previsions cun pics straordenaris di alte maree, in particolâr a Grau e a Lignan, e à permetût – al à visât Riccardi – di meti in sigurece il teritori e di limitâ i dams, cuntun centenâr di volontaris impegnâts”. (Foto: Grau inagade). (ADG) – 22.11.2022
