I tratôrs in corteu par proteste a Pordenon

Pivetis che a sunavin di un continui, bandieris de Italie e dal Friûl, cartei une vore clârs. Lis rivendicazions dai agricultôrs a son rivadis ancje a Pordenon. Vuê 117 tratôrs a àn invadût lis stradis citadinis, dilunc de manifestazion inmaneade dal Comitato Spontaneo Agricoltori Pordenone, che di matine al à dât dongje lis fuarcis – plui di 200 personis – devant dal centri comerciâl Sme, di dulà che al è partît un lunc corteu che si è disnodât in citât par ribati lis domandis dal mont agricul. Al passaç dai tratôrs in tancj a àn aplaudît, altris a àn stuart il nâs pai discomuts causâts al trafic. Doi rapresentants dal comitât a son po dopo lâts in Prefeture dal viceprefet Anna Grazia Giannuzzi, che i àn consegnât un document in plui ponts di zirâ al Guvier. La manifestazion, al à dit il comitât, si podarès tornâ a fâle se al ves di ocori. (a.d.g.) – 13.02.2024