I fûcs de Epifanie: tradizions e predizions

Il plui cognossût, che si impie ai 6 di Zenâr su la culine parsore di Tarcint, al sarà il prin cence il “vieli venerant” dai ultins timps, Giordano Marsilio. Al so puest, un gnûf “espert” di predizions pal gnûf an: il plui zovin Andrea Maroè, nassût propit a Tarcint, agronom, istrutôr, espert e studiôs dai arbui – e no dome chel, stant che a ‘nd à scjalâts passe 15 mil – che martars al “learà” l’avignî cirint di capî dal fum dal “pignarûl grant” se al sarà un an bon (direzion: soreli jevât) o mancul (soreli a Mont). Cheste fieste tradizionâl dai fûcs, dentri des lidrîs de culture rurâl, e met dongje piçui borcs e citâts, cun desenis di fûcs impiâts in dut il Friûl: di fat, plui di 250! Si tache za lunis ai 5 sot sere tal Friûl ocidentâl e dongje dal mâr, intant che martars ai 6 – il dì di altris apontaments religjôs e identitaris tant che la Messe dal spadon a Cividât e chê dal talar a Glemone – a saran impiâts fugarelis e i pignarûi in dut il rest dal teritori. (A.I.) – 05.01.2026