E je previodude par doman la udience di convalide dal arest dai doi oms blocats martars sot sere a Udin par vie dai scuintris che a son stâts in place Primo Maggio a Udin ae fin dal corteu a pro de Palestine. E sarà la judiç pes indagjins preliminârs Maria Rosa Persico a decidi ce fa cuntun furlan di 45 agns che al è a stâ a Buie indulà che si cjate ai arescj domiciliârs e par un venit di 49 agns di Feltre che cumò si cjate in preson.
Par ducj e doi la acuse e je di resistence a public uficiâl, ingriviade dal fat di vê tirat ogjets bande des fuarcis dal ordin e par vê taponade la muse. Il venit al è ancje acusât di vê danezât un mieç de Polizie cul idrant, doprant la stangje di une bandiere come baston ancje cuintri dai agjents. (a.d.g.) – 16.10.2025
