I citadins si organizin dopo la serie di barafusis e agressions sucedudis a Udin intai dîs passâts. Martars ai 31 di Otubar al è stât presentât il Comitât “Udin sigure”. Par podê organizâ il Comitât, un grup di personis al à dât la proprie disponibilitât e si è organizât intun coordenament provisori che al à nomenât puartevôs Roberto Snaidero. In curt al sarà costituît il Comitât cul obietîf declarât di cjatâ fûr inte citât di Udin un clime di sigurece reâl e percepide.
“O dîs graciis a prefet, cuestôr e sindic intune cu lis feminis e ai oms des fuarcis dal ordin impegnâts in citât pal sfuarç che a son daûr a fâ par contrastâ un fenomen di delincuence difondude che fin cumò Udin nol veve viodût. Il gno pinsîr e il gno ringraciament a van al nestri sindic Alberto De Toni che fin dal principi si è impegnât inte ricercje di soluzions inovativis par arzarâ la problematiche sociâl de sigurece – al comente Snaidero -. Il nestri unic fin al è chel di metisi a disposizion des istituzions. Lu podìn fâ tirant sù lis segnalazions e lis propuestis in teme di sigurece dai stes citadins, metint, se ritignût bon des istituzions, a disposizion sistemis di videocontrol par creâ un coordenament unic e, dulà che pussibil, fasint interagjî ancjemò miôr formis di vigjilance privade che a son za in citât”.
Pôcs dîs prime il stes grup al veve creât une chat che e conte aromai plui di mil iscrits, preocupâts pe ondade di delincuence intal centri storic e in altris cuartîrs di Udin. La adesion massice, daûr dai organizadôrs “e conferme cetant ampli sedi il desideri tra la popolazion di tornâ sigurece, sedi reâl che percepide, a une citât che e je stade simpri esempli di civisim e operositât”. (a.d.g.) – 31.10.23
