Une vore di reperts archeologjics precolombians e egjizis a son stâts recuperâts dai Carabinîrs dal Nucli tutele patrimoni culturâl di Udin. Ducj chescj ogjets a fasevin part de colezion di un resident di verone cu la passion de colezion di ogjets antîcs, che al veve comprât ator pai piçui marcjâts dal Nord Est in trente agns, ma che no vevin lis documentazions obligatoriis di divignince lecite.
La investigazion e jere stade inviade tal 2017, coordenade de Procure di verone. Ducj i ogjets, statuis, vasuts e altris tocs in bronç o tiere cuete, che a jerin dal prin mileni prime di Crist e fin dal XVI secul dopo di Crist a son stâts tornâts indaûr aes ambassadis de Colombie, dal Costa Rica, dal Egjit, di Panama e de Republiche Dominicane. Tra i tocs plui impuartants une mascare di piere de culture Taino de Republiche Dominicane, metude dentri de liste rosse dal Icom pal alt risi di robariis. Ce che no si è rivâts a ricognossi al è stât mandât al Museu de civiltât di Rome. (a.d.g.) – 11.07.2025
