Gruesse fraude al fisc di passe 24 milions di euros

La Vuardie di finance di Trevîs e à scuviert une fraude di 24 milions di euros disfrutant il Superbonus 110%. Al centri dal imbroi un consorzi trevisan che al veve fat plui di 500 contrats in Friûl Vignesie Julie, Lombardie e Venit; inte metât dai câs, però, al veve tirât i credits cence fâ i lavôrs.

I financîrs a àn secuestrât credits di impueste par plui o mancul 7 milions di euros, e ancje beçs e imobii par plui o mancul 1,2 milions di euros. In graciis de complicitât di un inzegnîr e jere stade mandade ae Enea documentazion che e certificave in maniere false la esecuzion dai lavôrs. I trê responsabii de fraude a son stâts indagâts pal reât di imbroi ingriviât ai dams dal Stât. (A.D.G.) – 01.08.2022