Grâf l’om di Budoie che si è fat mâl cu la motosee

Al è grâf l’om di 76 agns che si è fat mâl, cheste matine, intant che al jere daûr a doprâ une motosee intai boscs di Budoie. A dâ l’alarme al è stât un parint che l’om al à clamât par domandâ jutori. Daurman la clamade al Nue112: i infermîrs de Sores a àn inviât sul puest l’ecuipaç di une ambulance di Sacîl e la machine di emergjence mediche di Pordenon. Visât intun prin moment ancje l’elisocors.
L’infermîr de sale operative al à vuidât al telefon il parint par blocâ la pierdite di sanc de feride a une gjambe, fin ae rivade dai sanitaris. Dopo la corse in ospedâl cu la ambulance, in codiç ros. (ADG) – 1.12.2022