A Triest al è tacât il protocol previodût cuant che e ven cjatade une persone cuntune malatie tropicâl di importazion, in chest câs dengue. Si trate di une persone foreste dome di passaç pe citât, che al fevele dome spagnûl e al veve durmît pôc lontan dal ospedâl Maggiore.
Lunis di matine e sarà inviade la disinfestazion cuintri des larvis su lis stradis e tai fossâi de zone dal viâl XX Settembre, vie Giulia e vie Farneto. Simpri inte stesse zone domenie e sarà fate la disinfestazion par copâ i mussats grancj.
Chest parcè che la dengue no si passe di om a om, ma dome midiant dai becons dai mussats. La incubazion de dengue e je di plui o mancul 5 o 6 dîs dal becon e la malatie e pues provocâ fiere alte, cun mal di cjâf e dolôrs muscolârs une vore fuarts. Di solit e dure trê o cuatri dîs e no son medisinis a pueste, ma dome chês par ridusi la fiere e i dolôrs.
Ducj i 192 câs di dengue in Italie tal 2026 a son stâts di importazion. Di chescj, vot a son stâts diagnosticâts in Friûl – Vignesie Julie. (a.d.g.) – 28.08.2026
