Gnove scjassade di taramot a Verzegnis di magnitudo 3,1

Ancjemò une scjassade di taramot a Verzegnis daspò de schirie tacade martars ai 14 di Avrîl tra i comuns di Preon e Verzegnis. Cheste volte il taramot al è stât plui fuart dal solit, pôc prime de une e mieze dopomisdì, cun epicentri a plui o mancul 5 chilometris a ovest – sud – ovest di Verzegnis e a une profonditât di 8,62 chilometris, come che al à sclarît Il Centri di ricercjis sismologjichis dal Ogs

No risultin segnalazions o clamadis ae Sores par dams a robis o personis, ma dome dôs clamadis par visâ dal fat, de bande di un citadin di Cjavaç e di un istitût scolastic di Tumieç, che al à inviât lis proceduris di evacuazion dai students e dal personâl. (a.d.g.) – 17.04.2026