Gnove rotatorie a Palme fûr di Puarte Cividât

Al è stât aprovât dal Consei Comunâl il progjet definitîf de gnove rotatorie a Palme. “Biadelore si met in sigurece un grop viari cetant delicât – al è il coment dal sindic, Giuseppe Tellini -, cambiant dal dut l’aspiet di une des trê jessudis de citât a forme di stele”. Fûr di puarte Cividât e vignarà fate une rotatorie che e metarà in conession la Strade Regjonâl SRUD 33, la Strade regjonâl (ex strade statâl) SR 252, via Risorgimento e il viâl di acès ae caserme Durli. Chest al è un colegament impuartant tra Palme, Jalmic e i Comuns di Trivignan Udinês e Visc, ma ancje cu la sede dal Ospedâl di Palme, la Protezion Civîl de Regjon FVJ e il svincul autostradâl. Intal progjet si previôt di fâ ancje un passant di jentrade dedicât ae struture militâr, par dividi il trafic civîl di chel dai mieçs militârs. (A.I.) – 15.09.2022