La Protezion civîl regjonâl e à pandût fûr une gnove alerte pal maltimp che al varès di bati par dute la zornade di joibe ai 17 di Setembar il teritori, soredut chel de Basse e des provinciis di Gurize e Triest, cuntune vore di atenzion soredut tes arei dal plan e de cueste, par vie de fuarte instabilitât provocade dal passaç di une perturbazion cun corints ocidentâls simpri plui umidis.
Lis primis ploiis a rivaran za vie pe gnot cun temporâi che a podaressin jessi ancje fuarts. Cheste gnove alerte e rive daspò dai inagaments e dai dams fats des fuartis ploiis soredut a Lignan e Tisane tai dîs passâts.
Ancje par chest la Protezion civîl e à domandât ai Comuns di controlâ ben il teritori e ju à invidâts a inviâ lis proceduris previodudis tal cas di criticitâts pussibilis. (a.d.g.) – 16.09.2026