Gnot di lavôr par Vigjii dal fûc e volontaris de Protezion civîl daspò dal maltimp

I Vigjii dal fûc a àn lavorat par dute la gnot par meti a puest i dams fats îr dal maltimp in dute la regjon. Soredut a Gurize, cul jutori ancje dai coleghis slovens che a àn metût a disposizion une autoscjale, a son stâts passe 20 i intervents lats indenant fintremai des vot di vuê a buinore, cuasi simpri par ramaçs e arbui tirâts jù dal aiaron.
In dute la regjon a son stâts passe 1240 i intervents: di chei 70 a Gurize, 50 a Udin, 37 a Pordenon – soredut S. Vît dal Tiliment e Cjanive – e sîs a Triest.
Cetant lavôr ancje par plui di 60 volontaris de Protezion civîl, intervignûts par tirâ vie ramaçs e arbui spacâts dal aiar fuart e judâ tai inagaments di cjasis dongje Udin, a Pasian di Prât e a Segrât. La velocitât plui alte dal aiar e je stade regjistrade sul Mont rest cun 136 chilometris par ore, ma a son stâts tocjats e 103 chilometris par ore a Gardiscje e i 93 inte zone dal aeropuart a Roncjis di Monfalcon. (a.d.g.) – 22.07.2025