Fusîi di assalt, semiautomatics cui lôr cjariadôrs, ma cence palotulis, sierâts cun tante cure dentri di valisutis a pueste e, al somearès, une vore ben tignûts. E je la cjatade, par dî pôc stranie, fate dai carabinîrs di Tarvis intun bosc dongje de strade statâl 54, chê che e zonte Tarvis al confin cu la Slovenie, inte frazion di Fusinis. No fevelìn di zuiatui, ma di armis che, ancje cence vê il tîr automatic, a son une vore potentis e a son catalogadis tant che armis di vuere.
Si trate di un fusîl “Steyer AUG A3 Kommando”, il stes model doprât (automatic) dal esercit austriac, di un fusîl “Wbp” di produzion polache (la copie dal rus Kalashnikov Ak-47) e di un semiautomatic Daniel Defence (forsit il model DD5V4), di produzion americane. Sul puest a son stâts clamâts i artificîrs dal Comant provinciâl di Udin, che a àn cirût improntis e a àn verificât che lis armis a fossin discjamadis e in sigurece. Al somee, su la fonde dai prins aciertaments, che chescj fusîi a sedin stâts doprâts in azions criminâls in Austrie. (a.d.g.) – 28.05.2026
