Fûc suntun camion dilunc la autostrade viers Tarvis, codis e rellentaments

Veicui a pas di om dilunc de corsie di sorpàs de A23 intal trat tra Cjargne e Pontebe, in direzion Tarvis. Un camion cjariât di gjornâi al à cjapât fûc lì dal km 79 pôc prime 1.40 dopomisdì, causant par un pôc di timp ancje il bloc dal trafic. Il fûc al è stât distudât in curt in graciis de rivade svelte dai pompîrs.

Al moment (dât inzornât aes 5 dal dopomisdì) al è consintût il passaç dome su la corsie di sorpàs, par permeti di scjariâ i bancâi sul mieç, distacât dal tratôr stradâl. Sul lûc dal incident a son intervignûts i pompîrs cun trê autopompis, i socors sanitaris e lis patuliis de polizie stradâl, di là dal personâl di Autostradis pe Italie. No son par fortune ferîts. (ADG) – 17.10.2022