Tor 11 di vuê di matine al è sclopât un fûc inte L.A. Visintini Srl di Paulêt, imprese specializade te lavorazion di metai pe produzion di mobii, dilunc de strade provinciâl 104. Al somee che a cjapâ fûc al sedi stât polvar metalic presint dentri dal stabiliment.
A distudâ daurman lis flamis a son stât i stes operaris che doprant i estintôrs a àn studât il fûc prime che al podès slargjâsi. Dulinvie di chestis operazions dut il rest dal personâl al jere lât fûr dal stabiliment in cundizions di sigurece e cence che nissun si sedi fat mâl.
Cuant che a son rivâts i pompîrs, no jerin plui flamis impiadis e lis scuadris rivadis sul puest a àn cussì podût bonificâ il puest e controlâ che nol fos il pericul che si impiassin altris fûcs. (a.d.g.) – 06.07.2026
