Fûc intun apartament cun dentri doi disabii

Doi oms disabii di 31 e 60 agns a son restâts intosseâts îr sot sere a Udin in vie Sabbadini, dopo che dentri dal lôr apartament si jere impiât un fûc.

Lis flamis a son tacadis di un cuadri eletric par causis sot investigazion. I doi oms, forescj, a vivevin di timp tal apartament di proprietât de associazion Vicini di Casa, doprât di personis cun fragjilitât.

Sul puest a son rivâts i pompîrs, il personâl sanitari e i carabinîrs dal Nucli Radiomobile di Udin. I doi residents puartâts in ospedâl no saressin in pericul di vite. L’apartament al à patît une vore di dams e i Vigjii dal fûc lu àn declarât inagjibil. (a.d.g.) – 08.10.2025