Un grant fûc al à interessât, îr di gnot, Villa Luisa Strassoldo a Dael. l’alarme al è saltât tor de 1.30, dopo che un vicin al à viodût fum e flamis dispresonâsi de residence storiche che e rimonte al 1600.
Sul puest, al civic 11 di vie Vittorio Emanuele, lis Vuardiis dal fûc cun trê autopompis (dôs dal distacament di Çarvignan e une di Udin) e dôs autobotis (une dal distacament di Çarvignan e une di Udin). Il fûc al à interessât dôs grandis stanziis su doi plans. Lis flamis a àn distrut ad implen il solâr. Grancj i dams, calcolât ancje il valôr storic de vile.
Dopomisdì, dentri de vile, al jere stât preparât un set fotografic. A cetant che si è podût imparâ fin cumò i cjaminets intes dôs stanziis a jerin stâts piâts. Il fûc, dut câs, al sarès sclopât par causis acidentâls, in cors di investigazion de bande des Vuardiis dal fûc e dai Carabinîrs de stazion di Dael. Cheste matine i pompîrs a àn completât lis operazions di bonifiche e metude in sigurece dal imobil. (A.D.G.) – 19.12.2022
