Al è fuart corot in dute la Cjargne pe muart di Sandro Valent e Mauro Darpin, i doi oms muarts sabide che a jerin cognossûts e stimâts de comunitât.
La tragjedie e je sucedude tor de ore di gustâ intant che i doi oms di 55 e 60 agns, a stavin cjapant sù visc tai boscs parsore Denemonç, adun cuntun lôr cusin. Un dai doi al à tacât a rodolâ jù e al veve cirût di cjapâsi a un ramaç che si è rot e chel altri par cirî di judâlu al è sbrissât daûr. Il cusin al à dât daurman l’alarme tant che al è rivât in pôc timp l’elicotar cui tecnics dal socors alpin che a stavin fasint une esercitazion pôc lontan. Il personâl dal Socors alpin si è calât cu la binte indulà che a jerin lâts jù i doi cusins, ma ju à cjatâts za muarts par vie des feridis masse grivis. (a.d.g.) – 09.12.2025
