Fraudadôrs in vore a Udin

A tornin in azion i fraudadôrs cuintri dai vecjos. Cheste volte e je tocjade a une femine di 81 agns. Vuê di matine a Udin, inte zone di viâl Tricesimo, un om no cognossût, fasint fente di jessi un tecnic dal acuedot al à tucât ae puarte de femine.

Judât di un compliç vistût di poliziot, il delincuent al à convinçude la siore a meti zoiis e bêçs dentri dal frigorifar (la tecniche e je simpri chê) cu la scuse che la aghe e jere incuinade.

Daspò i doi a àn cjapât su’ il botin, par un valôr di 5 mil euros e a son lâts vie. Lis investigazions lis fasin i carabinîrs de stazion di Udine Est. (a.d.g.) – 28.08.2024