Fraudadôrs in azion ancje a Clausêt

Ancjemò viei sot dal atac dai fraudadôrs. La ultime vitime e je une siore di 85 agns che e je a stâ a Clausêt, clamade al telefon di un fals carabinîr che le informave che la targhe de machine che e veve e jere stade clonade, par jessi daspò doprade par une rapine intune buteghe dal oresin.

Il delincuent al à domandât ae vitime di controlâ l’aur che e veve in cjase par podêlu meti a confront cun altri che al jere stât robât. Magari cussì no la siore e je colade tal tramai e e à consegnât a un compliç rivât in cjase 500 euros in contants e une vore di zoiis. Dome cuant che si è inacuarte de fraude e à clamât i carabinîrs e e à presentât une denunzie. (a.d.g.) – 26.02.2026