A va indenant, magari cussì no, la bugade di fraudis cuintri dai vielis in Friûl cun tentatîfs fats su dut il teritori. Polizie di Stât e Carabinîrs no stan a cjalâ e intes ultimis oris a son stâts arestâts cuatri delincuents.
La prime operazion e à puartât al arest di doi zovins di Aversa, in Campanie, di 26 e 29 agns, daspò di lungjis investigazions fatis des Scuadris mobilis di Udin e Caserta. La indagjin e jere tacade daspò di une fraude fate cul metodi dal carabinîr fals, fate a un citadin di Udin che i vevin puartat vie monedis e aur par 40 mil euros. L’om al jere colât tal tramai di un control sul aur dentri cjase daspò di une rapine fate intune buteghe dal oresin, I doi si cjatin cumò ai arescj dentri cjase cul braçalet eletronic.
Tal stes timp i carabinîrs a àn rivât a blocâ un tentatîf di fraude tal moment che i malvivents a jerin in azion, simpri a Udin, indulà che un vieli di 88 agns al jere stât convinçût a consegnâ ducj i siei bêçs a un om su la puarte di cjase. L’intervent dai carabinîrs al à fermat il tentatîf e permetût l’arest di doi oms di fûr de regjon, di 39 e 43 agns, puartâts drets in preson.
Dome îr, intal Friûl Ocidentâl a son stâts regjistrâts dai carabinîrs 13 tentatîfs di fraude cu la scuse dal incident stradâl fals di un di famee, ma par fortune ancje i nestri vielis a stan tacant a sta plui in vuaite e nissune des fraudis e je lade a bon fin. (a.d.g.) – 07.05.2026
