Flamis di un machinari intune aziende di Cormons

Pôc prime des 7 di matine i Vigjii dal fûc di Gurize a son rivâts cuntune scuadre, une autobote e une autoscjale intune aziende che e fâs imbalaçs a Cormons, indulà che al jere tacât un fûc intun machinari.

Cuant che a son rivâts i pompîrs, i assegnâts de aziende a vevin morestât un pôc lis flamis e cussì i vigjii a àn podût finî il lavôr par dopo meti in sigurece il capanon. Un dai assegnâts ae sigurece de aziende, sul principi dal fûc al veve inalât un pôc di fum e al è stât par chest compagnât tal ospedâl di Gurize par fâ controi dal personâl sanitari rivât sul puest.

Lis causis dal fûc a son sot investigazion. (a.d.g.) – 28.04.2025