Finîts i lavôrs de rotatorie di plaçâl Cavedalis a Udin

Cu la asfaltadure de rotatorie di plaçâl Cavedalis a Udin, al è stât completât l’intervent impuartant che al à trasformât une des croseris cun plui trafic inte citât. La segnaletiche orizontâl e sarà fate daspò des ploiis e a saran metudis ancje lis bancjutis, come che al à visât l’assessôr comunâl ae Viabilitât Ivano Marchiol.

Un altri pas indenant al jere stât fat cul completament di Corte Villalta, il pôl nassût de ricualificazion de ex Dormisch che vuê al dâ acet al Its Academy, ma la trasformazion di cheste zone de citât e larà indenant parcè prime dal Istât e je previodude la viertidure dal parc soterani di Spazio Villalta, che al metarà a disposizion 103 puescj auto, che si podarà jentrâ de rotatorie. (a.d.g.) -29.05.2026