Terminade la grande fieste in spiete des Pentecostis, Lignan e fâs il belanç su la gjestion de serade di sabide ai 27 di Mai che e à riclamât plui o mancul 80 mil turiscj, in buine part austriacs. La temude ‘calade dai barbars’ e je stade contignude e no à creât grues discomuts, a part cualchi proteste de bande dai residents pal volum de musiche mandade fûr di cualchi bar di vie Udin e pai refudums lassâts dilunc des stradis dal centri, in particolâr inte zone di Place Fontana, netade pôc dopo la albe di domenie.
Dal pont di viste sanitari a son stâts gjestîts 18 intervents di socors, ducj tratâts sul puest e pal plui leâts a mâi no grâfs.
Sodisfat il comandant de Polizie locâl di Lignan, Alessandro Bortolussi. “Un pôcs di ecès a son stâts – al riferìs -. Cualchi lamentance pe musiche ancje. Ma a son robis inevitabilis calcolant il morbin dai zovins e la presince enorme di turiscj. In fin dai fats – al va indevant il comandant -, la grande fieste di sabide di gnot si è fate cence problemis particolârs, ancje in graciis dal presidi fuart mitût impins cun plui o mancul 50 agjents di Polizie di Stât, locâl, carabinîrs e Vuardie di finance. Tra di lôr ancje doi agjents de Polizie austriache e trê che a vegnin dal Trentin-Sud Tirôl. A controlâ lis viis de localitât balneâr, cun di plui, a jerin i cjans antidroghe de Polizie locâl di Trent e de Vuardie di finance, che a àn nasât e fat secuestrâ piçulis cuantitâts di stupefacentis. Fatis, infin, diviersis denunziis par cjoche. (A.D.G.) – 29.05.2023
