Il furlan Luca Visentini, segretari gjenerâl de organizazion internazionâl dai sindicâts Ituc, la confederazion sindicâl plui grande dal mont (za segretari regjonâl de Uil – Friûl-Vignesie Julie), e l’ex europarlamentâr Antonio Panzeri a son stâts fermâts de Polizie vuê a Brussel, insiemi a altris dôs personis, par vie di une inchieste par coruzion suspiete.
I fers a son stâts fats publicâts dai cuotidians Le Soir e Knack e a son stâts confermâts dal Tribunâl federâl belghe. Daûr des informazions racueltis dai incuirents, si suspiete che il Qatar, Paîs là che a stan zuiant i Mondiâi di balon, al vedi tentât di influençâ lis decisions economichis e politichis dal Parlament european.
Daûr di ce che a scrivin i gjornâi belghis, i fermâts a son a disposizion dal judiç istrutôr che, intai prossims doi dîs, al podarès decidi par eventuâi mandâts di arest. Intal ambit de azion inviade vuê a buinore, la polizie e à fat ancje 14 percuisizions.
A Brussel, a cjase di Panzeri, tant che al scrîf Le Soir, i incuirents a àn cjatât 500 mil euros in contants. Ducj i fermâts a son di nazionalitât o di origjin taliane. Tra di lôr ancje il diretôr di une Ong e un assistent parlamentâr. (ADG) – 9.12.2022
