Chen Fengjiao, citadine di origjin cinese di 54 agns e je stade copade îr tor des 4.30 tal dopomisdì a S. Zuan dal Nadison ae colme di une barufe. A cjapale tal cuel cuntun curtis, dentri cjase in vie delle Scuole, al sarès stât il so om, di origjin cinês ancje lui, fermât dai carabinîrs.
Su la fonde des primis investigazions, la barufe e sarès tacade tor des 3 e mieze dal dopomisdì e a sarès lade indenant fintremai cuant che i berlis a saressin deventâts plui fuarts e a si son sintudis de bande dai vicins le domandis disperadis di jutori de bande de femine e a àn clamât il 112.
Cuant che i socoridôrs, carabinîrs e sanitaris, a son jentrâts in cjase, al jere masse tart: la femine e jere par tiere cuntune brute feride tal cuel e a jere za muarte. L’om, che al jere dentri cjase e nol à fate nissune resistence, al è stât puartât daurman te caserme par jessi scoltât.
Cheste tragjedie e rive 13 agns dopo dal sassinament di une altre femine, sucedût simpri a S. Zuan dal Nadison ai 18 di Jugn dal 2013, cuant che Irma Hadaj di 32 agns e fo copade dal so om cun 37 scurtissadis denant des fiis piçulis. E ancje cheste volte, la comunitât e je restade cence peraulis par chest gnûf at di violence cuintri des feminis. (a.d.g.) – 30.08.2026
