No son dome i fraudadôrs che a fasin finte di jessi carabinîrs, avocats, tecnics dal gas e vie indenant. A son ancje chei in gjachete e colarine che a proponin afârs di no pierdi, che si presentin ben e a san fevelâ, ma ae fin il fin al è simpri chel, rivâ a imbroiâ la int.
Al è restât imbroiât ancje un om di 69 di Tisane che al à molât a un fals intermediari, che i veve prometût vuadagns di no crodi, pase cuarante mil euros e che ae fin al à scugnût lâ dai carabinîrs par domandâ jutori. Il contat cul fraudadôr al durave de Istât passade, simpri par telefon e di chê volte il citadin al veve tacât a mandâ bêçs. Cuant che al veve di cjapâ indaûr i siei fonts cui vuadagns prometûts, l’intermediari al è sparît e ae vitime nol è restat altri ce fâ che lâ dai carabinîrs par presentâ une denunzie. (a.d.g.) – 10.02.2026
