Escursioniste muarte dopo jessi colade intun sdrup a Taipane

Une escursioniste e je muarte intal prin dopomisdì di vuê tal teritori dal comun di Taipane dopo jessi colade intun sdrup. La femine e je sbrissade dilunc dal troi che e stave fasint adun cun altris escursioniscj che no àn podût fâ nuie par judâle e a àn daurman clamât i socors.

Sul puest a son rivâts in pôc timp i tecnics dal Socors alpin, i Vigjii dal fûc, i militârs de Vuardie di finance e i sanitaris dal elisocors che a àn viodût la vitime dal alt. Une volte rivâts tal pont indulà che si cjatave il cuarp, no àn podût fâ altri che aciertâ la muart e inviâ la domande par podê puartâ vie il cadavar. (a.d.g.) – 09.04.2025