Prime zornade dai esams di maturitât par passe 9.000 students des scuelis superiôrs de nestre regjon. La prove di vuê e jere dedicade ae prove scrite di talian, intant che vinars ai 19 e sarà la seconde prove, leade ae materie che e caraterize il percors scolastic.
In dute Italie i candidâts a son 527.747, il 0,6% in plui a pet dal an passât. Tal Friûl-Vignesie Julie si fevele invezit di 9.170 students, il 0,8% in plui: 4.084 in provincie di Udin, 2.247 in chê di Pordenon, 1.637 in chê di Triest, 1.002 a Gurize. Ae maturitât a son stâts ametûts il 97,1% dai nestris students, une percentuâl pôc plui alte di chê taliane che e je dal 96,8%.
“Dutis lis 267 comissions di esam a son insediadis – e conferme Patrizia Pavatti , diretôr dal ufici scolastic regjonâl –. O sin pronts a tacâ cu la gnove maturitât che e met al centri i students”. (a.d.g.) – 18.06.2026
