Tor des 2 di gnot, Vincenzo Paglialonga al va sù pês scjalis e al rive tal apartament de vicine di cjase, Lauretta Toffoli. Armât di curtìs, al cîr di convinci la siore di 74 agns a dâi i bêçs, ma la femine – in altre maniere rispiet a chês altris voltis – si opon e lui le colpìs prime devant de jentrade di cjase, dopo inte cusine là che jê e cîr di salvâsi. Chi Lauretta e ven copade cun 38 curtissadis. Paglialonga al strissine il cuarp fin ae cjamare di jet, al cîr di netâ l’apartament dal sanc de vitime e al svalise la abitazion. I judiçs de Cort di Assise di Udin a àn ricostruît cussì ce che al è sucedût al numar cuatri di vie della Valle inte capitâl furlane vie pe gnot dai 7 di Mai dal 2022.
La ricostruzion e je scrite neri su blanc inte sentence che la Cort e à condanât Paglialonga al ergastul. A incjastrâ l’om a son stâts la grande cuantitât di materiâl biologjic assegnabil a Paglialonga sot des ongulis di Lauretta, lis olmis des sôs scarpis di gjinastiche cjatadis su la sene dal delit, i bens de femine cjatâts a cjase sô.
La Cort e à escludût che Paglialonga al fos in part o dal dut incapaç di intindi e volê. Dal sigûr l’om, a disin i judiçs su la scorte dai parês dâts dai consulents, al à une personalitât disturbade. Ma cheste no i impedive di savê chel che al faseve. Plui che altri, lu à puartât a tignî compuartaments irazionâi dopo l’omicidi. Paglialonga al è stât ritignût colpevul di omicidi e rapine, ma e je stade escludude la agravante de crudeltât. (a.d.g.) – 31.01.2024
