Ecelencis de Cjargne in mostre a Tumieç

Di joibe ai 27 ai 30 di Otubar al torne a Tumieç, dopo trê agns di polse, l’apontament cun “Il filo dei sapori – la Carnia ti dà il cuore”. La rassegne agroalimentâr e rapresente une oportunitât uniche par cognossi di dongje lis ricjecis dal teritori di mont e lis musis di contadins, produtôrs e cogos che a son puartevôs di chest patrimoni. Dopo la inaugurazion e la benedizion dal an agrari a pene passat, a saran vierts plui di 60 bancuts intal centri di Tumieç: pardabon un marcjât di ecelencis cun salâts, formadis, pomis, distilâts, farinis, patatis, jerbis spontaniis e oficinâls, cjanaipe, biris artesanâls, mîl e specialitâts de tradizion locâl. In program ancje cercis, laboratoris e incuintris formatîfs leâts al disvilup de agriculture. (A.I.) – 25.10.2022