Dôs feminis feridis intun brut incident a Remanzâs

Incident stradâl pluitost brut vuê tal dopomisdì a Remanzâs indulà che dôs machinis, une Fiat 500 e une Bmw, a àn fat un frontâl.

Il bot al è stât par dabon fuart e i Vigjii dal fûc rivâts di Cividât a àn scugnût lavorâ une vore, doprant ancje cisoris e machinis speciâi par rivâ a tirâ fûr de Fiat la femine ae vuide, une fantate di 22 agns che e je stade puartade in svol cul elicotar daurman tal ospedâl di Udin.

Ancje che altre femine che e vuidave la Bmw – une siore di 62 agns di Cividât –  e je stade puartade vie cul elicotar. Dutis e dôs si cjatin di cundizions grivis. (a.d.g.) – 13.05.2025