Dopli incident vuê di matine a S. Vît dal Tiliment

Al è stât traspuartât cul elicotar tal ospedâl di Udin l’om di 50 agns che cheste matine, in localitât Capraio, a S. Vît dal Tiliment, intant che al jere ae vuide di un furgon, al è finît intal fossâl che al disfilie la strade. Lis causis a son al studi de polizie locâl. Estrat dal abitacul des Vuardiis dal fûc, l’om al à ripuartât un traume cranic e un traume toracic.

Pôc dopo simpri a S. Vît, tra lis viis Carbona e Bando, e je stade socorude une femine di 60 agns che ae vuide di une Yaris e je lade a bati cuintri un pâl dal telefon. E je stade puartade par aciertaments li dal ospedâl citadin. (a.d.g.) – 19.10.23