Tal dopomisdì di îr i carabinîrs dal Nucli operatîf Radiomobile di Udin a àn arestât ae fin di une corse daûr di un furgon robât te zornade prime doi zovins extracomunitaris di 19 agns, residents in provincie di Udin.
Il mieç al jere stât puartât vie la zornade prime a une associazion sportive di Cuar di Rosacis dongje dal palaç dal sport locâl. La robarie e jere stade denunziade e cuant che i carabinîrs lu àn viodût passâ a àn cirût di blocâlu ma i doi a àn acelerât. E je cussì tacade une corse cence rispiet pai semafars e metint in pericul cui che al passave par strade fintremai cuant che il vuidadôr dal furgon nol à pierdût il control lant a sbati cuintri dal mûr di une cjase cun dams une vore bruts pal mieç.
Jessûts fûr dal mieç, i doi zovins a àn cirût di slontanâsi a pît ma in pôc timp i carabinîrs a àn rivât a blocâju. I doi delincuents a son stâts puartâts daurman in preson a Udin a disposizion dai judiçs. (a.d.g.) – 05.05.2026
