La Polizie e à arestât a Udin doi citadins egjizians di 18 e 19 agns. I doi a vevin rapinât intai bagns de stazion des corieris un om puartant vie 20 euros.
La vicende e rimonte ae matine di sabide passade, cuant che i doi egjizians a àn svicinât un om di 47 agns domiciliât a Turide di Sedean, intant che si lavave lis mans. Il disgraciât al è stade butât a tiere e cjapât a pidadis. Dopo, par fâsi dâ il biliet che l’om al tignive in man, chel plui zovin lu à muardût al indiç. Cjapât il botin magri, i doi a son scjampats, ma i agjents de Cuesture ju àn cjapâts pôc dopo inte stazion feroviarie. Chel plui vecjo si è difindût disint che la vitime ju veve svicinâts domandant lôr di vendii dal hashish. Diferente la version de vitime: la cubie lu veve svicinât ufrintji il stupefacent, di lui refudât.
Îr il Gip di Udin Mariarosa Persico e à validât l’arest e disponût par chel plui zovin la custodie cautelâr in preson e par chel altri i arescj domiciliârs cun braçalet eletronic intune residence di acet de Arcidiocesi di Turin. (a.d.g.) – 01.02.2024
