Dôs personis a son stadis arestadis a Napoli dai Carabinîrs, su ordin dai judiçs di Udin, cu la acuse di vê fraudât une siore di 72 agns, che e vîf inte Basse furlane. I doi delincuents, ai 25 di Mai dal an passât, a vevin puartât vie ae vitime zoiis dal valôr di passe 15 mil euros.
I investigadôr a àn tornât a fâ su ce che al jere sucedût: i doi criminâi, fasint finte di jessi carabinîrs, a vevin clamade la femine al telefon visantle che la targhe de sô auto e jere stade copiade e metude suntun altri mieç, doprât par fâ rapinis. Intant che l’om de siore al stave lant inte caserme dai carabinîrs par firmâ un verbâl (mandât li dai delincuents) i doi a vevin mandât un carabinîr fals a cjapâ su lis zoiis che la vitime e veve vût ordin di preparâ.
I carabinîrs a àn scuviert, su la fonde des testemoneancis e des telecjamaris di control, cui che a jerin i criminâi, che a son stâts blocâts daspò a Napoli. (a.d.g.) – 06.03.2026
