Doi muarts a Breçan e centenârs ancjemò cence cjase

Dôs personis a son muartis daspò dal brut timp che al à sdrumât il Friûl di domenie di sere passade fint a lunis. Guerrina Skocaj, 82 agns, e je stade cjatade dai pompîrs aes 10 e mieze di lunis di sere daspò che la sô cjase e je colade intune fracade di tiere a Breçan di Cormons. Cualchi ore prime, al jere stât cjatât ancje Quirin Kuhnert, un citadin todesc di trentedoi agns che al veve cirût di salvâ propit la femine che e jere a stâ te cjase dongje de sô, adun cuntun tierç resident, che al è stât cjatât vîf, ma ferît. I doi muarts a jerin sparîts des cinc di buinore, cuant che un flum di pantan de Mont di S. Zorç al veve parât vie trê cjasis dongje de glesie dal paîs. Intant, il soreli al è tornât in dute la regjon, ma la situazion in tancj lûcs, soredut a Vierse tal comun di Romans dal Lusinç, e reste grivie, cu la aghe che e à inondât cjasis e stradis, obleant tancj di lôr a evacuâ. La Regjon e à za stanziât un milion di euros pai prins intervents urgjents, ma il president Fedriga al à domandât a Rome plui risorsis. (A.I.) – 18.11.2025