A àn vût il lôr ce fâ vuê di matine i Vigjii dal fûc par cause di doi mieçs lâts a fûc, un furgon e un camion.
Il prin câs a Vilès dilunc la autostrade A34 tal toc tra la bariere di Vilès e Gardiscje: il vuidadôr si è inacuart che il so mieç al stave cjapant fûc e si è fermât daurman in bande par dopo clamâ i socors. Cuant che a son rivâts i pompîrs il furgon al jere dal dut involuçât des flamis che a stavi9n tacant ancje il vert bande de strade.
Pôc dopo, tor nûf mancul un cuart a Davian, dilunc de strade bande Plancjaval, al à cjapât fûc un camion. Intant che al stave fasint la rive, l’autist al à viodût che dal denant dal mieç al vignive fûr fum. Parcât in bande de strade il camion e smontât adun cuntun altri coleghe, l’autist al à domandât daurman jutori, intant che che chel altri om al cirive di studâ il fûc che si jere impiât cuntun estintôr, ma cence rivâ a fa masse, tant che cuant che a son rivâts i pompîrs di Pordenon, dute la cabine dal camion e jere za plene di flamis, ancje par cause di une pierdite di gasoli che al coreve ancje sul asfalt e che al jere rivât fintremai tal bosc. I vigjii ancje in graciis di une autobote, a àn rivât a studâ il fûc daurman blocant lis flamis prime che a tacassin il bosc. (a.d.g.) – 03.06.2025
