Doi laris di machinis cjapâts a Lignan dai carabinîrs

Cuant che une patulie dai carabinîrs, dilunc dai controi fats sot sere al Prin di Fevrâr a Lignan ju àn blocâts, intor a vevin dai argagns eletronics e clâfs fatis a pueste par vierzi lis machinis.

I doi citadins forescj di 48 e 60 agns a son stâts viodûts dai carabinîrs dentri di une machine parcade fûr di un supermarcjât cundut che aromai la buteghe e jere sierade.

Il control fat sui doi al à permetût di cjatâ cussì il materiâl doprât di solit par vierzi lis machinis, che al è stât daurman secuestrât. Di la de denunzie, pai doi delincuents al è stât ancje domandât l’ordin di slontanament dal Comun di Lignan. (a.d.g.) – 02.02.2026