Doi fraudadôrs di 32 e 33 agns a son stâts arestâts dai agjents de Polizie di Stât di Udin pôc dopo vê robât a une siore di 87 a Cividât. I doi delincuents a vevin doprât il truc dal maressial falât: un di lôr al faseve finte di jessi un maressial dai carabinîrs e al telefonave ae siore par visâle che sô fie e veve cjapât sot une frute e par no lâ in preson e coventavin daurman bêçs e robe di valôr di consegnâ a un assegnât dal tribunâl. La puare siore, sconvolte e veve daurman consegnât dutis li zoiis che e veve, plui o mancul 20 mil euros di valôr al delincuent, che al jere scjampât a pene vude la robe.
I agjents de Scuadre Mobile però a stavin lant daûr de auto dai delincuents e a son intervignûts daurman, rivant a blocâle. Dentri un russac plen di robe robade. Tal Hotel di Segrate, indulà che i doi malvivents a durmivin a son stadis cjatadis cetantis altris zoiis. Ducj e doi a son stâts daurman arestâts. (a.d.g.) -03.11.2025
