Al à patizât une pene par omicidi stradâl il zovin che vie pe gnot dai 14 di Avrîl dal 2023 al veve provocât l’incident indulà che e jere muarte Martina Socciarelli, di 18 agns. La pene, doi agns e trê mês di preson e trê agns di sospension de patente, e je stade decidude dal judiç de udience preliminâr di Udin Carlotta Silva.
A patizâ Matteo Urban, 22 agns resident a Darte, che al jere ancje stât indagât adun cun altris dôs personis pe ipotesi di reât di gare clandestine, ma la sô posizion e jere stade archiviade par chest reât. In chê gnot la automobil vuidade dal zovin di Darte, dilunc de strade provinciâl 1 dal Cjanâl dal Arzin, subite dopo lis cjasis di Cjaicis tal comun di Verzegnis, e veve invadût chê altre corsie, cjapant in plen il motocicli vuidât de puare fantate. (a.d.g.) – 18.02.2025
