I agjents de Stazion de Vuardie forestâl regjonâl di Vile di Cjargne a àn scuviert timp indaûr une discjarie te frazion di Davaste a Davâr. Si trate di scovacis e porcarie butats in dôs areis di 1.400 e 1.000 metris cuadris par une vore di agns, suntun teren di proprietât comunâl pôc lontan dal troi Cammino delle Pievi.
I agjents a àn metût in vore foto tramais par scuvierzi cui che al butave inte discjarie e, cul jutori dai agjents de Polizie locâl de Comunitât de Mont de Cjargne a àn rivât a identificâ sîs personis che a son stadis dutis denunziadis e che ur tocjarà paiâ une sanzion di 2.500 euros par om.
Il Comun di Davâr al à za tacat a fa netâ la zone, ma a coventaran setemanis di lavôr par meti dut a puest.
Pe ocasion il Cuarp forestâl regjonâl al vise che cui che al bandone refudums no pericolôs al è a risi di paiâ fintremai a 18 mil euros di multe. (a.d.g.) – 09.06.26
